रुग्णवाहिका वेळेत न आल्याने गरोदर महिलेची स्कायवॉकवरच प्रसूती; कल्याणमधील धक्कादायक घटना

Thane News: कल्याण पूर्वेकडून कल्याण पश्चिमेकडील रुग्णालयात जात असताना महिलेला स्कायवॉकवरच प्रसूती कळा सुरु झाल्या. रुग्णवाहिका न आल्याने स्थानिक रिक्षाचालकांनी या महिलेची मदत केली.

कल्याण: प्रसूतीसाठी कल्याण पूर्वेकडून स्कायवॉकवरून पश्चिमेकडील रुग्णालयात जात असलेल्या महिलेला स्कायवॉकवरच प्रसूती कळा सुरू झाल्या. रुग्णवाहिकेशी संपर्क करूनही रुग्णवाहिका येत नसल्याचे पाहून अखेर उपस्थित महिला तसेच काही रिक्षाचालक मदतीला धावले. याच दरम्यान ही महिला प्रसूत होऊन तिने बाळाला जन्म दिला. रिक्षाचालकांनी खासगी रुग्णवाहिका बोलावून या महिलेला रुग्णालयात दाखल केले. बुधवारी रात्रीच्या सुमारास ही घटना घडली.

कल्याण पूर्व भागात राहणाऱ्या सुरेखा शिंदे या महिलेला प्रसूती वेदना सुरू झाल्याने, ती महापालिकेच्या रुक्मिणीबाई रुग्णालयात निघाली होती. कल्याण पूर्वेतील रेल्वे स्थानकाच्या स्कायवॉकवर ती पोहोचली असता, तिला प्रसूतीकळा असह्य झाल्या. ते पाहून काही रिक्षाचालक तिच्या मदतीला धावले.

तिला रुग्णालयात नेण्यासाठी रुग्णवाहिका बोलावण्यासाठी १०८ क्रमांकावर फोन केला. मात्र रुग्णवाहिकेसाठी आणखी दोन-तीन कॉल असून रुग्णवाहिका निघाल्याचे त्यांना सांगण्यात आले. मात्र त्या ठिकाणी रुग्णवाहिका पोहोचलीच नाही. अखेर महिलेची अवघड अवस्था पाहून रिक्षाचालकांनी प्रसंगावधान राखत एका महिलेला पाचारण केले. याच दरम्यान, या गर्भवतीची स्कायवॉकवरच प्रसूती होऊन तिने बाळाला जन्म दिला. अखेर खासगी रुग्णवाहिकेस पाचारण करत, महिलेसह तिच्या नवजात बाळाला खासगी रुग्णालयात पोहोचवण्यात आले.

गरजेच्या वेळी मदतीला धावून जाणाऱ्या रिक्षाचालकांचा शिवसेना कल्याण पूर्व शहरप्रमुख महेश गायकवाड यांनी सत्कार केला.