शाळा बंद करताना वॉचमनचा निष्काळजीपणा; चिमुरडी वर्गात अडकली, रडण्याचा आवाज ऐकून स्थानिकांनी केली सुटका

छत्रपती संभाजीनगरमधून एक धक्कादायक घटना समोर आली आहे. महानगरपालिकेच्या शाळेतील सुरक्षारक्षकाने शाळा बंद करताना खबरदारी न घेता वर्गखोल्यांना कुलूप लावल्याने एक चिमुकली वर्गातच अडकली. रडण्याचा आवाज ऐकून स्थानिकांनी तिची सुटका केली.

छत्रपती संभाजीनगर: शहरातील महानगरपालिकेच्या रोजा बाग येथील उर्दू प्राथमिक शाळेत पहिल्या वर्गात शिकणारी लहान चिमुकली मुलगी वर्गात कोंडली गेल्याची घटना सोमवारी घडली. स्थानिक नागरिकांच्या ही बाब लक्षात येताच कुलूप तोडून मुलीला बाहेर काढले. सदर घटना वॉचमनच्या दुर्लक्षामुळे घडली असल्याचं आरोप स्थानिक नागरिकांनी केला आहे.

याबाबत अधिक माहिती अशी की, रोजा बाग परिसरात महानगर पालिकेच्या उर्दू माध्यामाची प्राथमिक शाळा आसून येथील वर्ग चार वाजेपर्यंत भरविण्यात येतो. सोमवारी सकाळी आठ ते दोन वाजेपर्यंत नियमित वेळ प्रमाणे शाळा भरून दुपारी २ वाजता शाळा सोडण्यात आली होती. परंतु एका वर्गात लहान चिमुकल्या मुलीचा मोठ्याने रडण्याचा आवाज येत असल्याने परिसरातील नागरिकांनी शाळेचा दिशेने धाव घेत बघितलं असता , एक मुलगी वर्गात कोंडली गेल्याचे दिसले. तसेच वर्गाला कुलूप असल्याचं निदर्शनास आलं. यानंतर स्थानिक नागरिकांनी तत्काळ वर्ग खोलीला लावलेले कुलूप तोडून त्या मुलीला वर्गाचा बाहेर काढले.

मिळालेल्या माहितीनुसार शाळा सकाळी ८ ते दुपारी २ वाजेदरम्यान भरली होती. दुपारी २ वाजेला शाळेची सुट्टी झाल्यानंतर संबधित वॉचमन वर्ग खोलीची तपासणी न करता वर्गाला कुलूप लावून निघुन गेला. या वॉचमनच्या दुर्लक्षामुळे सदर मुलगी वर्गातच काही तास तशीच रडत राहिली.

या घटनेची मनपा शिक्षण विभागाने दाखल घेत संबधित वॉचमनच्या दुर्लक्षामुळे घटना घडली असल्याने त्याला तत्काळ कामावरुन काढून टाकलं असल्याची माहिती शिक्षण विभागणी दिली आहे. तसेच शाळेच्या मुख्यधापिकांकडून या घटनेचा खुलासा मागितला आहे.