२३ दिवस मृत्यूशी झुंज, अखेर तिने लढाई जिंकली, मरणासन्न अवस्थेत आलेली चिमुकली रुग्णालयातून हसत-हसत परतली

Snake Bite Little Girl: सर्पदंशाने मरणाच्या दारात गेलेल्या आठ वर्षीय मुलीची मृत्यूशी झुंज यशस्वी ठरली आहे. डॉक्टरांच्या अथक प्रयत्नांमुळे तिचा जीव वाचला आहे.

 छत्रपती संभाजीनगर: सर्पदंशाने शब्दश: मरणाच्या दारात गेलेल्या आठ वर्षीय मुलीने २२ ते २३ दिवसांची अत्यंत कडवी झुंज दिली आणि ही झुंज डॉक्टरांच्या अथक प्रयत्नांमुळे सार्थकी लागली. भुसावळहून मरणासन्न अवस्थेत शहरात दाखल झालेली चिमुरडी हसत-हसत आपल्या गावी गेली.

भुसावळ येथील मुलीला घराच्या परिसरात मानेवर सर्पदंश झाला. तपासणीनंतर तिला नागाने दंश केल्याचे लक्षणांवरून स्पष्ट झाले. त्यानंतर तिला भुसावळ येथील रुग्णालयात दाखल करण्यात आले आणि सलग पाच दिवस व्हेंटिलेटरवर उपचार करूनही कोणताच फरक पडत नसल्याचे स्पष्ट झाल्यानंतर तिला शहरातील कमलनयन बजाज रुग्णालयातील बालरोग विभागात दाखल करण्यात आले. रुग्णालयात दाखल करताना तिच्या मूत्रपिंड व यकृतावर सूज आली होती; तसेच मेंदू, फुफ्फुस, छातीसह इतर अवयव व स्नायूंवर विविध गंभीर परिणाम होऊन अर्धांगवायूसारखी स्थिती निर्माण झाली होती. त्यामुळे तिला दाखल केल्यापासूनच तिच्यावर व्हेंटिलेटरवरील उपचार सुरू करण्यात आले होते. सलग आठवडाभर व्हेंटिलेटरवर विविधांगी उपचारांची शर्थ लढवण्यात आल्यानंतर हळूहळू प्रकृतीत फरक पडत गेला. औषधांना प्रतिसाद मिळत गेला आणि दोन आठवड्यांच्या सलग उपचारानंतर चिमुरडीच्या प्रकृतीत सुधारणा झाल्यानंतर तिला नुकतीच सुटी देण्यात आली, 

संबंधित रुग्णामध्ये दिसणाऱ्या लक्षणांवरून दंश करणारा साप हा विषारी का बिनविषारी हे स्पष्ट होतेच;शिवायविषारी दंश हा नागाचा आहे की धामणचा आहे, याचीही बरीचशी कल्पना येऊ शकते. नागदंशानंतर मेंदूसह विविध अवयवांमध्ये अर्धांगवायूसारखी स्थिती निर्माण होते, तर धामणने केलेल्या दंशानंतर आणखी वेगळी लक्षणे असतात, अशी माहिती देण्यात आली.

एकूण सर्पदंशाच्या केसेसमध्ये सुमारे ३० टक्के केस या मुलांच्या असतात. मात्र, अनेकदा दंश कोणत्या सापाने केला आहे हे कळत नाही व त्यात वेळ दवडणे चुकीचे ठरते. त्यामुळे तत्काळ डॉक्टरांचा सल्ला घेतला पाहिजे. अर्थातच, बिनविषारी सर्पदंशाचा धोका तुलनेने कमी असतो आणि उपचार लवकर पूर्ण होतात - डॉ. निखिल पाठक, बालरोगतज्ज्ञ