केवळ स्टंटबाजी आणि नागरिकांत भीती पसरवण्यासाठी तीन युवकांनी एका महिलेवर तलवारीने हल्ला केला. ती महिला आपली बसने प्रवास करीत होती.
नागपूर : केवळ स्टंटबाजी आणि नागरिकांत भीती पसरवण्यासाठी तीन युवकांनी एका महिलेवर तलवारीने हल्ला केला. ती महिला आपली बसने प्रवास करीत होती. धावत्या बसमध्ये त्यांनी हल्ला केला. गुन्हे शाखेच्या पथकाने तीन तासात ‘स्टंटबाजां’ना जेरबंद केले. अभिजित यादव (२४), रा. मानकापूर, मो. जैद सिकंदर शेख (१८) असे अटकेतील आरोपींची नावे आहेत.त्यांचा तिसरा साथीदार रोहीत ऊर्फ करण नौकरिया (१९), रा. मानकापूर हा फरार असून पोलीस त्याचा शोध घेत आहेत.गोधनी रेल्वे येथील रहिवासी फिर्यादी सोनाली श्रीवास्तव (३९) या आपली बसने घरी जाण्यासाठी निघाल्या. बस पागलखाना चौकात असताना दुचाकीवर तीन आरोपी आले. काही कळण्याआधीच त्यांनी महिलेवर तलवारीने हल्ला करीत त्यांना रक्तबंबाळ केले आणि पळून गेेले. काही अंतरावर बस थांबली. चालक आणि वाहकाच्या मदतीने महिलेवर उपचार करण्यात आले. सदर पोलीस ठाणे गाठून त्यांनी सारा प्रकार सांगितला. घटनेचे गांभीर्य लक्षात घेता पोलिसांनी गुन्हा नोंदवून दोघांना अटक केली. फरार रोहितचा शोध पोलीस घेत आहेत.अभिजित, जैद आणि रोहित तिघेही एका ॲक्टिव्हावर फिरत होते. दारूच्या नशेत लोकांना तलवार दाखवत रस्त्याने स्टंटबाजी करीत होते. त्यांनी मद्याच्या दुकानातही गोंधळ घातला. नंतर केवळ भीती पसरवण्यासाठी त्यांनी महिलेवर हल्ला केला.
0 Comments