मुख्यमंत्री एकनाथ शिंदे यांनी शनिवारी पंतप्रधान नरेंद्र मोदी यांची भेट घेतली. या भेटीनंतर मोदींनी ट्विट करत एकनाथ शिंदेंचं कौतुक केलं आहे.
शनिवारी महाराष्ट्राचे मुख्यमंत्री एकनाथ शिंदे यांनी सहकुटुंब पंतप्रधान नरेंद्र मोदी यांची भेट घेतली. या भेटीनंतर त्यांनी ट्विट करत याबाबत माहिती दिली. 'देशाचे पंतप्रधान म्हणून कणखर आणि सक्षम असलेल्या मा. नरेंद्र मोदीजी यांनी आज माझे वडील, पत्नी, मुलगा, सून आणि नातू यांच्यासह मला सदिच्छा भेटीला बोलावून आपलेपणाने विचारपूस केली. माझ्या कुटुंबाशी निवांत गप्पा मारल्या. त्यांच्या व्यस्त कार्यक्रमातून आमच्यासाठी वेळ काढला. पंतप्रधानांची आपुलकी, आशीर्वादाचा हात आणि आस्था नवे बळ देणारी आहे', असं एकनाथ शिंदे यांनी आपल्या ट्विटमध्ये म्हटलं होतं. दरम्यान आता पंतप्रधान नरेंद्र मोदी यांनी देखील एकनाथ शिंदे यांच्या ट्विटला रिप्लाय देताना त्यांचं कौतुक केलं आहे.
काय म्हटलं पंतप्रधान मोदींनी?
शनिवारी एकनाथ शिंदे यांनी पंतप्रधान नरेंद्र मोदी यांची भेट घेतली. या भेटीनंतर मोदींनी ट्विट करत एकनाथ शिंदे यांच्या कामाचं कौतुक केलं आहे. 'महाराष्ट्राचे गतिशील आणि कष्टाळू मुख्यमंत्री एकनाथ शिंदेजी यांना आणि त्यांच्या कुटुंबाला भेटून आनंद झाला. महाराष्ट्राच्या प्रगतीसाठीची त्यांची तळमळ आणि विनम्र स्वभाव कौतुकास्पद आहे', असं ट्विट मराठीमधून मोदींनी केलं आहे.
0 Comments