Solapur Crime: लग्नानंतर ३ वर्षांत तरुणीने आयुष्य संपवलं, कारण उघड होताच माहेरच्या मंडळींनी सासरी घरासमोरच दिला अग्नी

Solapur Crime News : सासरच्या लोकांवर जोपर्यंत गुन्हे दाखल होत नाहीत, तोपर्यंत मृतदेह ताब्यात घेणार नसल्याची भूमिका माहेरच्या लोकांनी घेतली. दुपारी अडीच वाजेदरम्यान गुन्हा दाखल झाला आणि त्यानंतर मृतदेह ताब्यात घेतला.

सोलापूर: टीव्ही आणि चारचाकी गाडी घेण्यासाठी माहेरून एक लाख रुपये आण, असा तगादा लावत विवाहित महिलेला त्रास दिला. तसंच सासऱ्याने विनयभंग केल्याने सदर विवाहितेने राहत्या घरी विष प्राशन करून आत्महत्या केल्याची घटना माढा तालुक्यातील निमगाव (टेंभुर्णी) येथे घडली आहे. याबाबत टेंभुर्णी पोलीस ठाण्यात सासू, सासरा व नवरा यांच्याविरोधात गुन्हा दाखल करण्यात आला आहे. विवाहित महिलेचा मृत्यू झाल्यानंतर माहेरच्या लोकांनी सासरच्या दारातच अंत्यसंस्कार करून संताप व्यक्त केला. प्राजक्ता रोशनकुमार चट्टे असे आत्महत्या केलेल्या विवाहितेचे नाव असून याप्रकरणी मयत प्राजक्ताची आई सविता दत्तात्रेय लोंढे (रा. पिंपळनेर, ता.माढा) यांनी फिर्याद दिली आहे. टेंभुर्णी पोलिसांनी पती व सासू, सासऱ्याला अटक केली आहे. या घटनेने सोलापूर जिल्हा हादरला आहे.

टेंभुर्णी येथील पोलीस सूत्रांकडून मिळालेल्या माहितीनुसार, मयत प्राजक्ताचे लग्न १५ एप्रिल २०२० रोजी निमगाव (टें) येथील रोशनकुमार चट्टे याच्याबरोबर झाले होते. लग्न झाल्यानंतर तीन वर्षांपासून पती रोशनकुमार, सासरे नारायण चट्टे व सासू कौशल्या चट्टे हे तिघे प्राजक्तास माहेरहून टीव्ही घेऊन ये, चारचाकी गाडी घेण्यासाठी एक लाख रुपये आण म्हणून छळ करत होते.

सासऱ्याने विनयभंग केला आणि तिने विषप्राशन केले

सासऱ्याने नात्याला काळिमा फसण्याचा प्रयत्न केला होता. १७ जून २०२३ रोजी सासरे नारायण चट्टे यांनी सुनेचा विनयभंग केला. यावरून झालेल्या भांडणात प्राजक्ताने १८ जून रोजी सकाळी घरातच विष प्राशन केले. ही बाब माहेरच्या लोकांच्या लक्षात येताच त्यांनी प्राजक्ताला अकलूज येथील रुग्णालयात उपचारासाठी दाखल केले होते. मात्र उपचार सुरू असताना २६ जून रोजी प्राजक्ताचा मृत्यू झाला.

गुन्हा दाखल झाल्यानंतर दारातच अंत्यसंस्कार

रुग्णालयात उपचारादरम्यान प्राजक्ताचा मृत्यू झाला. मृत्यू झाल्यानंतर मृतदेह शवविच्छेदनासाठी सरकारी रुग्णालयात पाठवून देण्यात आला होता. सोमवारी दुपारी १२.३० वाजता मृतदेह निमगावमध्ये आला. मात्र नातेवाईकांनी ताब्यात घेण्यास नकार दिला. सासरच्या लोकांवर जोपर्यंत गुन्हा दाखल होत नाही तोपर्यंत मृतदेह ताब्यात घेणार नसल्याची भूमिका घेतली. दुपारी अडीच वाजेदरम्यान गुन्हा दाखल झाला अन् मृतदेह ताब्यात घेतला. त्यानंतर प्राजक्ताच्या मृतदेहावर निमगाव येथे सासरी दारातच अंत्यसंस्कार करण्यात करुन नातेवाईकांनी संताप व्यक्त केला. टेंभुर्णी पोलिसांनी पतीसह तिघांविरुद्ध गुन्हा दाखल केला. तसंच याप्रकरणी पती रोशनकुमार चट्टे व सासू कौशल्या चट्टे या दोघांना अटक केली. पुढील तपास सहायक पोलीस निरीक्षक गिरीष जोग करीत आहेत.