जादूटोण्यासाठी केमिकल घरी आणलं,काम सुरु करताच जे घडलं ते भयंकर,गाव हादरलं, जखमी युवकाबाबत अपडेट, तपास सुरु

Crime News : छत्रपती संभाजीनगर जिल्ह्यातील कन्नड तालुक्यातील युवकानं जादुटोणा करण्यासाठी एक केमिकल विकत आणलं होतं. त्यावर प्रक्रिया करण्याच्या उद्देशानं ते मिक्स करत असताना स्फोट झाला अन त्यात तो भाजला. त्याचा उपचारादरम्यान मृत्यू झाला.

 छत्रपती संभाजीनगर: जिल्ह्यातील कन्नड तालुक्यातील नागापूर येथील एका तरुणाने जादूटोणा करण्याचे उद्देशाने केमिकल आणून घरात ठेवलं होतं. त्यानंतर घरात केमिकल मिक्स करत असताना केमिकलचा भीषण स्फोट होऊन तरुण गंभीर जखमी झाला होता. या घटनेतील गंभीर जखमी तरुणाचा शनिवारी (ता. २४) दुपारी अडीच वाजल्याच्या सुमारास घाटी रुग्णालयात उपचार सुरू असताना तरुणाचा मृत्यू झाला आहे.

या प्रकरणी अधिक माहिती अशी की, समीर सलीम शेख (वय ३५ रा. नागापूर, ता. कन्नड जि. छत्रपती संभाजीनगर) असे मृत्यू झालेल्या तरुणाचे नाव आहे. २० जून रोजी समीर शेख या तरुणाने काही केमिकल घरी आणले होते. तो या केमिकलच्या माध्यमातून जादूटोणा करण्याच्या उद्देशाने प्रक्रिया करत होता. यावेळी केमिकल मिक्स केलं असता या केमिकलचा भीषण स्फोट झाला. स्फोटाची तीव्रता एवढी होती की अक्षरशा गावात याचा आवाज झाला.

नागापूर गाव स्फोटाच्या आवाजाने हादरले होते. यानंतर गावकऱ्यांना नेमकं काय घडलं याचा अंदाज आला नव्हता. समीर शेख याच्या घरात हा स्फोट झाला होता. यात तो स्वतः गंभीर जखमी झाला होता. या स्फोटामध्ये समीर हा ९० टक्के भाजला गेला होता.त्याच्यावर छत्रपती संभाजीनगर येथील शासकीय घाटी रुग्णालयात उपचार सुरू होते. ९० टक्के भाजला गेला असल्यामुळे उपचारांना म्हणावा तसा प्रतिसाद समीर कडून मिळत नव्हता. मात्र, उपचार सुरू असताना शनिवारी समीर शेख यांची प्राणज्योत मालवली. शासकीय रुग्णालयात त्याची उत्तरीय तपासणी करण्यात आली.यानंतर त्याचा मृतदेह नागापूर येथे नेण्यात आला.

दरम्यान, समीर याने हे केमिकल कुठून आणले होते. या केमिकलच्या माध्यमातून काय करण्याचा समीरचा उद्देश होता. याच्यासोबत कोणी सहकारी होतं का याचा तपास पोलीस करत आहेत. याप्रकरणी अधिक तपास पिशोर पोलीस ठाण्याच्या सहायक निरीक्षक कोमल शिंदे यांच्या मार्गदर्शनाखाली हेडकॉन्स्टेबल किरण गंडे, कराळे, अंमलदार साई घुगे हे करत आहेत.