कॉलेजचा पहिलाच दिवस ठरला शेवटचा, घरापासून काहीच अंतरावर १६ वर्षीय मुलीसोबत अनर्थ घडला

Nanded Accident Girl Died: कॉलेजच्या पहिल्याच दिवशी एका मुलीला आपला जीव गमवावा लागला आहे. ही मुलगी कॉलेजला जायला घरातून निघाली. पण, घरापासून काहीच अंतरावर तिच्यासोबत अनर्थ घडला.

नांदेड: आकरावीत प्रवेश घेतल्या नंतर आज पहिल्याच दिवशी कॉलेजसाठी घरातून निघालेल्या एका १६ वर्षीय तरुणीवर नियतीने घात केला. ट्रकच्या धडकेत तरुणीचा जागीच मृत्यू झाला. मंगळवारी सकाळी ८ वाजेच्या सुमारास नांदेड जिल्ह्यातील हिमायतनगर तालुक्यातील वडगाव गावा जवळील मोरगाव फाटा येथे ही मन सुन्न करणारी घटना घडली. पूजा देवजी चिरपकटलेवार असं या मयत तरुणीचं नाव आहे.

मयत पूजा देवजी चिरपकटलेवार ही जिल्ह्यातील हिमायतनगर तालुक्यातील मोरगाव येथील रहिवासी आहे. दहावी उत्तीर्ण झाल्यानंतर तिने आकरावीसाठी भोकर तालुक्यातील एका महाविद्यालयात प्रवेश घेतला होता. आज मंगळवारी सकाळी ती कॉलेजसाठी घरून निघाली होती. कॉलेजला जाण्यासाठी घरा पासून काही अंतरावर असलेल्या बसस्टॉपकडे जात होती. महामार्ग रस्ता क्रॉस करत असताना भरधाव वेगात भोकरहून हिमायतनगर जाणाऱ्या एमएच ३८ डी ०२८४ ट्रकने तरुणीला चिरडलं. ट्रकचा चाक डोक्यावरून गेल्याने तिचा जागीच मृत्यू झाला. घटनेनंतर परिसरात एकच खळबळ उडाली.

घटनास्थळी नागरिकांची मोठी गर्दी जमली होती. दरम्यान, घटनेनंतर फरार झालेल्या ट्रक चालकाला पोलिस आणि नागरिकांनी पाठलाग केला. मात्र, पाठलाग करत असल्याने ट्रक चालकाने रस्त्यावरच ट्रक सोडला आणि तो पसार झाला. दरम्यान, कॉलेजचा पहिलाच दिवस आणि त्यातच दुर्देवी घटनेत तिच्या मृत्यूने गावात शोककळा पसरली आहे. एका १६ वर्षीय तरुणीचा अपघातात मृत्यू झाल्याने नागरिक हळहळ व्यक्त करत होते.

 राष्ट्रीय महामार्गावर वाहनाचा वाढलेला वेग आणि बेसुमार पळवणाऱ्या गाड्या बेशिस्त चालकामुळे अपघातात दिवसेंदिवस वाढ होत आहे. गाव तिथे गतिरोधक दिल्यास अपघाताच्या वाढत्या प्रमाणाला आळा बसेल, असे नागरिकांतून ऐकावयास मिळत आहे. राष्ट्रीय महामार्गाचे वरिष्ठ अधिकाऱ्यांनी याची नोंद घेऊन दिवसेंदिवस राजकीय महामार्गावर होत असलेले वाढते अपघाताला आळा घालण्याचा प्रयत्न करावा, असेही अनेकांच्या तोंडून घटनास्थळावर ऐकण्यास मिळत होते.